你唔係第一個，亦都唔會係最後一個
講真，我哋團隊每個人都養死過植物。嗰種心情我明——朝早返工見到塊葉黃咗，心諗「唔緊要，仲有綠色嘅部分」；第二日多兩塊黃，開始上網急救；第三日成枝枯埋，投降。呢篇文章分享10個辦公室常見嘅「植物命案」，睇完你會發現：搞死植物嘅方法千變萬化，但救返佢嘅方法其實好簡單。
案件一：溺斃案 — 每日澆水當恩情
案發經過：阿明好有心機，朝早返工澆一次、食完飯澆一次、放工前再澆一次，諗住「我對你咁好，你一定生得好靚」。點知個盆底下長期浸住水，兩個星期後植物軟晒身，拔起嚟一睇，啲根爛到發黑。
死因：過度澆水導致爛根。啲根要「唞氣」——泥土濕透之後要乾返，根部細胞先可以正常運作。長期浸水會令根部缺氧腐爛，仲容易滋生真菌。
避免方法：手指插入泥土2cm，乾先澆。大部分辦公室植物寧願乾啲都唔好濕壞。
案件二：曬傷案 — 玻璃後面的烈日
案發經過：阿怡將盆龜背竹擺喺落地玻璃旁邊，「植物咪要曬太陽囉」。幾日後葉面出現一撻撻啡色斑，好似燙傷咁。
死因：隔住玻璃嘅直射陽光會聚熱，葉片組織被「煮熟」咗。大部分觀葉植物原產熱帶雨林底層，習慣咗散射光，根本頂唔住直射。
避免方法：擺喺離窗邊1-2米嘅位置，或者有窗簾過濾嘅地方。見到葉面有啡斑即刻搬開。
案件三：餓死案 — 會議室角落嘅悲歌
案發經過：行政姐姐話「會議室太空，擺盆植物美化下」，於是盆散尾葵被流放喺完全冇窗嘅角落。三個月後變咗一盆枯柴。
死因：冇光就冇光合作用，植物冇能量製造養分。散尾葵雖然耐陰，但完全冇光都頂唔順。
避免方法：冇窗嘅房間要選極耐陰植物如虎尾蘭，而且要定期搬去有光嘅地方「充電」幾日。
案件四：風乾案 — 冷氣口下冇倖存者
案發經過：為咗涼快，盆植物被擺喺冷氣機出風口正下方。個土乾到龜裂，葉又凍到發紫，兩個星期內去咗見佛祖。
死因：冷氣直吹令土壤快速乾燥，溫度驟降亦會令植物進入「休克」，根系吸水能力停頓。
避免方法：搬離冷氣出風口至少1米，定期轉盆方向，夏天要更頻密檢查泥土濕度。
案件五：逼爆案 — 兩年冇換盆
案發經過：買返嚟嗰個膠盆擺咗兩年，有一日拎起嚟睇，啲根已經由盆底個窿穿出嚟，盤根錯節，幾乎冇晒泥土。
死因：根部塞滿晒成個盆，冇泥土就冇地方儲水儲養分，植物被「餓死」喺自己嘅根入面。
避免方法：每年春季檢查一次，見到根穿出盆底或者水滲得好慢，就係換盆信號。
案件六：髮型災難 — 亂剪變禿頭
案發經過：網上話「修剪促進生長」，阿強攞住把剪刀見黃就剪，仲覺得剪多啲會生得快啲。結果原來茂盛嘅橡皮樹變成地中海禿頭，元氣大傷。
避免方法：只剪完全枯黃或變啡嘅葉片，保留帶綠嘅部分。每次修剪唔好超過整體三分一，讓植物有葉面積進行光合作用。
案件七：鹽漬案 — 好心做壞事嘅肥料
案發經過：阿芬聽講施肥會生得快，諗住「多啲總好過少啲」，結果盆底面出現白色結晶，泥土變硬，植物奄奄一息。
死因：肥料過濃，鹽分累積喺泥土面，根部被「醃」到脫水。呢個叫「肥害」，救返好難。
避免方法：寧願淡啲，液肥用包裝指示嘅一半濃度就夠。先澆水後施肥，秋冬季少施或停施。
案件八：蟲災蔓延 — 小事變大禍
案發經過：塊葉後面有幾粒白色點點，「唔緊要啦小問題」。兩個星期後成盆都係介殼蟲，仲蔓延到隔籬同事盆花度，成個office要集體滅蟲。
死因：介殼蟲繁殖速度驚人，一隻母蟲可以生幾百隻仔。蟲害初期最容易處理，拖愈久愈難搞。
避免方法：每星期花30秒檢查葉背，見到白色棉絮狀物體或者啡色小點（蟲），用棉花棒蘸酒精點死佢，嚴重就噴苦楝油。
案件九：乾屍案 — 長假無人理
案發經過：農曆新年放十日假，返嚟發現盆天堂鳥變咗乾柴，塊葉一撥就碎。
避免方法：大盆植物一般可以頂一星期。放長假前澆透水，搬去陰涼處減少蒸發。更耐旱嘅植物如虎尾蘭頂到兩三星期都冇問題。
案件十：挑戰難度 — 蝴蝶蘭開張禮物
案發經過：公司開張收到盆蝴蝶蘭，好靚！於是日日澆水、曬太陽、勤力施肥，一個月後佢同你講拜拜。
死因：蝴蝶蘭唔係土種，係種喺水苔入面，水苔保水性極強，日日澆水會浸死。而且蝴蝶蘭唔鍾意直射太陽，屬於進階級植物，新手一開始挑戰佢好比打機直接打Boss。
避免方法：新手先由虎尾蘭、龍血樹、金錢樹開始，累積信心先再挑戰蘭花。
寫喺最後
睇完呢10個案件，係咪覺得自己都曾經係兇手？唔緊要，每個植物達人背後都有一堆植物屍體。最重要嘅係從失敗中學習——下次見到泥土濕，忍唔住想澆水嗰陣，記住：手指插入2cm，乾先澆，就咁簡單。
如果你想由「殺手」變身「達人」，PlantShop 幫到你。我哋專做 130–180cm 大型植物，每盆都係親手揀過，只揀健康強壯嘅植株。隨盆附送真人照顧卡，寫明澆水、光照、擺位注意事項。有疑問隨時 WhatsApp，真人回覆，陪你一齊學識照顧植物。
相關產品
以下係文章中提及嘅植物，可以直接選購。每盆都附真人照顧卡，WhatsApp真人回覆：
